3. plass med K.L.M. Kilroy

I dag starta eg mitt andre montéløp utanfor Bergen, og det gjekk veldig bra. Eg fekk ri K.L.M. Kilroy for Kari Anne Knutsen. Han var veldig hissig i varminga, men fungerte fint. Me tok på bussar etter varminga, og så fekk han sjekk på seg. I volten tulla han seg litt, og det kjentes ut som om han skulle ta avgarde feil veg, men eg fekk han heldigvis på betre tankar. Starten vår vart ikkje så god som han kunne vore, men han løyste fint og svarte veldig godt på hestane som kom bak. Han gjekk fint i tet. Då Kings Centaurus kom opp på sida sleit eg fælt med å sleppa teten. Han svarte og vart ekstremt hissig, men Kings Centaurus kom forbi til 500-meterspasseringa.

Me låg i ledarrygg til den siste langsida. Han kjendes veldig sprek ut, og gjekk godt opp på sida på Kings Centaurus. Det vart ein merkeleg situasjon i den siste svingen. Moon Dreamer som låg bak meg, valde innersporet og gjekk på innsida av Kings Centaurus. Dette var eit sigersgivande trekk som gjorde at Moon Dreamer vann. K.L.M. Kilroy vart usikker i gangen då eg prøvde å dra skylappane, så eg droppa å dra dei og konsentrerte meg om å støtta han til mål. Eg synest han fullførte veldig fint og han fekk 3. plass på 1.18,9. Han gjekk eit godt løp. Eg valde å ri på sikkerhet frå svingen og ned oppløpet, for 3. plass er mykje betre enn galopp. Han var ein veldig fin hest å ri, og det var eit artig bekjentskap.