Ny seier med Rousseau

På torsdag rei eg mitt andre montéløp på Rousseau Detain. Han var like fin å ri denne gongen. Roleg og fin i varminga, utan stress. I volten var han ikkje heilt fin, så det var vanskeleg å volta med han og me fekk ein omstart. Etter omstarten fekk eg skritta litt med han, og då kom han seg. Starten vår var grei. News Wind/Mette Nyløkken galopperte på startsida, og hindra oss litt, men heldigvis er han travsikker og tok det fint.

Det vart strekk i feltet og me hadde veldig langt fram. Som venta var det Magic Star D.K./Renate Aarlie som fekk teten, men tempoet var heldigvis lavare enn eg frykta. Første 500 meter vart passet etter 1.22,6 og første 1000 meter etter 1.20,5. Då hadde me framleis veldig langt fram.

1200 meter frå mål drog eg proppane, og han svara med å finna eit ekstra gir så me tok att feltet. Inn på den nest siste svingen drog eg skylappane, og det gjev meg eit kick for han aukar farten med ein gong. Så me angrip i andrespor og passerer hest etter hest. Inn på siste svingen har me kun Magic Star D.K./Renate og Thai Sunshine/Julie Mari Eikså foran oss. Han er på hugget og eg kan dra ut i tredjespor. Løpsviljen kjem godt til syne og han er raskt forbi dei. Etter det kan me berre kontrollera inn til mål. Bak oss avsluttar News Wind/Mette Nyløkken godt til andre. Renate Aarlie får tredje med Magic Star D.K.

Det er veldig stort å få ri Rousseau. Han er ein fantastisk hest som kan gjera all jobben sjølv. All ære til Erik og Rune som har lagt ned ein god jobb i hesten. Eg er veldig takknemleg for at eg har fått lov å ri han desse løpa.